'Yan wasan Najeriya mata na yajin aiki

'Yan wasan kwallon kafa mata na Najeriya Super

Falcons sun yi zaman dirshan a otal din da suke

a Abuja, sai an biya su hakkokinsu da alawus

dinsu na cin kofin da suka yi.

Hukumar kwallon kafa ta Najeriya ta yi wa

zakarun na Afirka da suka dauki kofin kasashen

Afirka a karo na takwas bayan sun ci Kamaru

mai masaukin baki 1-0 ranar Asabar, alkawarin

biyansu bashin kudaden da suke bi na baya kafin

a fara gasar a Kamaru.

Wasu rahotanni sun bayyana hukumar kwallon

kafa ta Najeriya ta fitar da wata sanarwar inda

ta ce babban sakatarenta Dakta Mohammed

Sanusi, ya je otal din 'yan wasan inda ya gana da

su da jami'ansu.

Sanarwar ta ruwaito Dakta Sanusin ya tabbatar

da cewa 'yan wasan da jami'ansu suna bin

kudaden, kuma ya ce ba sa farin ciki da hakan.

Amma saboda matsalar tattalin arziki da kasar

ke ciki, za su ci gaba da rarrashin 'yan wasan da

duk wadanda suke binsu kudade har lamarin ya

inganta.

Duk da rokon da hukumar kwallon kafar ta

Najeriya ta yi wa 'yan wasan su yi hakuri har

al'amura su inganta, 'yan wasan na Super

Falcons sun lashi takobin ci gaba da zaman

dirshan din a otal.

Wannan ba shi ne karon farko da ake samun

matsala tsakanin 'yan wasan mata na Najeriya

da hukumar kwallon ta Najeriya, NFF ba a kan

kudade.

Shekara 12 da ta wuce, 'yan wasan sun ki fita

daga otal dinsu a Afirka ta Kudu har kwana uku,

bayan da NFF din ta kasa biyansu kudadensu

bayan sun ci kofin Afirkan na 2004.